Seni Budaya Daerah Lintang IV Lawang (Bag. 1)

Ado banyak kesenian di daerah kito Lintang Empat Lawang, anyo sayang lah banyak kesenian nyo nedo tekinak agi, karno banyak bujang gadis di dusun nendak agi belajar, bukan nedo mungkin kesenian khas daerah Lintang abis di telan zaman, embak kini Bujang gadis dusun galak a, nyanyi nyanyi nyo modern, bilo belajar kesenian daerah dewek uji o ketinggalan zaman, kito pacak kinai bilo dang ado nyo ngantenkan anak, kesenian nyo ado cuma organ tunggal, karaokean, ditambah agi mabuk mabuk an, nah ini bukan budayo kito, nah nedo panjang lib'ar agi kami cobo kupas nyo pertamo :
NGURIT (GURITAN)
Kesenian Guritan, embak kini lah nek katek agi di dusun, lah lenyap di telan gelombang zaman, kalu kito tanyokan ngan bujang gadis dusun kini, jawab nedo keruan pedio itu guritan.
Guritan, kesenian jaman ba'ri nyo nyeritokan tentang nenek puyang, biasonyo nyeritokan peperangan, berebut kekuasaan, kisoh ngan pelinjangan antaro putra putri rajo, nyo gunokan kesaktian,strategi dan lain o, cerito cerito ini pecayo nek pacayo cuma bukti o sampai kini giado peninggalan no, olok ; batu bersejarah di dusun Batu Pance, udem itu ado namo Lubuk Siluman dan lain o.
Kesenian Guritan ini, biasonyo diadokan nak acara ngagukan anak, nah jak dipihak uma calon bunting ngundang jemonyo nyo calak ngan mahir becerito Guritan ini, oi..nyo nonton ngan nengg'ar rami tegalau, biasonyo cerito Guritan ini makan waktu paling nedo 3 jam sampai 4 jam, kadang jak di petang enggut subuh.
Nah biasonyo nyo becerito ini megang GERIGEK nyo katek isi o, sambil ngalunkan irama Lintang Empat Lawang, sambil di ikuti Syair,pantun pantun nyo nawokan, nyo ado makno nyo, ini syair nyo gapat nian di nyanyikan ;

"Bukan bae Simpai bebaju abang
Burung Kedubu abang pulo
Bukan bae ngindu kemambang
Cera'i bekundang kemambang pulo"

Nah itu a sekilas tentang kesenian Lintang (GURITAN), mudah mudahan jemo tuo di dusun nyo masih ado ingatan tentang guritan ini, pacak mewariskanyo ngan kito kito nyo mudo, harapan kami telah kito gali,Lestarikan Kesenian daerah kito, jangan sampai lenyap nek katek agi ikas o, buleh bae kito ngikuti budaya modern mbak kini, anyo kesenian kito jangan di tinggalkan.
Tulisan ini masih banyak kekurangan o, nah kalu ado pemamangan,pebibian, pewak an, adeng adeng, dengan sanak...nyo singgah, tolong ditambahi ceritonyo (BERSAMBUNG)