Kuntao, Ilmu beladiri asli Lintang

Kemajuan teknologi ditambah banyak jemo dighi nyo sekolah keluagh daerah, secara langsung atau nedo langsung mempengaruhi kelestarian seni dan budayo daerah kito. Nyo pernah diulas oleh adinda Ismail antaro lain lagu-lagu daerah ngan Andai-andai.

Nah, di sini aku nedo nak mengomentari atau membahas ulasan adinda Ismail, tapi namba I seni budayo apo agi nyo perlu dilestarikan di daerah Lintang. Nyo aku keruan, mungkin hamper telupokan oleh jemo kito adolah Kuntau. Ini seni beladiri asli Jemo kito Lintang. Zaman dulu kuntao banyak disenangi jemo kito, kareno nyadi salah satu sarana memperat tali persaudaraan ngan untuk jago-jago kalu betemu ngan musuh.

Seni beladiri kuntao ini la cukup tekenal kehebatanno. Nineng aku dulu Pesirah Madjid alias Datuk (ini sekedar cerito atau untuk contoh) uji jemo-jemo tuo nyo nyadi kawan dekat Datuk, pernah belago melawan tenteran Nippon (jepang). Kuraso kito la paham kalu jemo jepang dipastikan nguasoi salah satu beladiri tradisional negeri dio, diantaronyo Karate, Ninjitsu (ninja), atau samurai.

Kebetulan, tentara jepang nyo belago ngan Datuk zaman dikalo, salah satu anggota klan Samurai. Datuk nguasoi kuntao, jurus andalanno Pisau Duo ngan Cabang. Jemo duo lain kebangsaan ini duel di Padang Surau (waktu itu maseh gimbo). Tentera jepang nyo makai samurai kalah, pedang samurai o berhasil direbut oleh Datuk. Sampai kini pedang itu maseh ado ngan kami keturunanno.

Itu sekedar contoh. Berarti kito nedo perlu minder ngan beladiri tradisional dewek. La nyadi kewajiban kito untuk ikut melestarikan seni beladiri kito. Contohnyo jemo Banten atau jemo Padang. Jemo Banten dimano bae dio tinggal pasti ngajarkan silat khas banten ngan anak keturunanno. Lok itu pulo jemo Padang. Rombongan Urang Awak ni ngembangkan Silat Pagaruyung. Sampai bak ini Silat Pagaruyung masih lestari bahkan dikenal jemo di seluruh Indonesia. Lok itu pulo ngan silat banten, contohnya Cimande atau TTKKDH (Tjimande Tari Kolot Kebon Djeruk Hilir) masih tekenal.

Waktu kecik aku pernah milu latihan kuntao di dusun Gunung Merakso Baru. Guru kami dulu namonyo Zenol, jugo jemo Gunung Merakso Baru. Cuma saying, diantaro rombongan kami dulu katek nyo tamat. Kami berenti latihan lantaran guru kami pegi ke Palembang nak nontot gawe.

Ado agi guru lain di Gunung Merakso Baru nyo cukup tekenal, yaitu Mang Muis. Kini beliau la almarhum. La banyak murid dio, tapi nyo tamat Cuma diket. Di generasi lebih tuo agi yaitu guru Mang Muis adolah Kiai Sidik. Zaman dulu dio ngajar jugo di Dusun Gunung Merakso Baru. Murid-murid o banyak nyo tamat. Diantaronyo mamanda Mukhtar Mak (Mang Tar), pegawai DLLAJR Provinsi Bengkulu.

Di dusun lain kuraso maseh banyak guru kuntao, Cuma kurang terekspose. Biasonyo latihan kuntao nih nedo di bada tebuka olok jemo latihan karate. Bada nyo biaso dijadikan latihan kuntao di kebon, atau pengger dusun, bahkan di dalam utan.

Tradisi itu dikaitkan ngan legenda bahwa jemo latihan kuntao disaksikan leh “Jemo Gonong” atau bahaso Indonesia o “Manusia Harimau” jak Gunung Dempo. Konon, jemo gonong ini nyo ngajari bangso manusio di Lintang ilmu beladiri kuntao.

Melaui forum ini aku menghimbau para boss, pejabat, jemo lintang nyo sugih, payo kito samo-samo melestarikan seni dan budaya daerah Lintang.

Nara sumber : Abdul Madjid